Tekjur, eignir og skuldir innflytjenda eftir flokkuðum fæðingarlöndum 2007-2017

Niðurstöður byggja á skattframtölum einstaklinga. Framtalsskyldir eru allir 16 ára og eldri sem eru skattskyldir á Íslandi. Byggt er á öllum framteljendum að undanskildum eftirfarandi. Framteljendur sem eru með handreiknað framtal, fá áætlaðan skatt á viðkomandi tekjuári eða árinu á undan, létust á árinu eða eru búsettir erlendis samkvæmt þjóðskrá. Handreiknað framtal fá þeir framteljendur sem ekki hafa búið á Íslandi nema hluta úr viðkomandi tekjuári, hafa hér á landi skattalega heimilisfesti, hafa tekjur hér á landi án þess að hafa hér búsetu, eins ef breytingar hafa orðið á hjúskaparstöðu eða aðrar þær breytingar á högum sem kalla á sérstaka meðhöndlun skattframtalsins. Erlendis búsettur telst sá sem hefur búið fleiri en 30 daga erlendis. Samhliða uppfærslu talnaefnis árið 2015 voru eldri tölur endurskoðaðar og bætt við útgáfu staðalfráviks, til að notendur fái betur áttað sig á undirliggjandi tekjudreifingu innan talnauppbrotsins. Með innflytjanda er átt við einstakling sem fæddur er erlendis og hverra foreldrar eru báðir fæddir erlendis og hafa erlendan bakgrunn. Báðir afar og báðar ömmur eru þannig fædd erlendis. Fæðingarlönd voru flokkuð eftir samtölu heilsu, menntunar, og efnahags sem gefin er út af Sameinuðu þjóðunum (Human Development Index). Samtalan er einskonar vísitala sem vegur saman mælingar á heilsu, þekkingu og efnahagslegri stöðu landa. Viðmiðunarárið er 2015, þar sem tölur frá 2015 voru nýjustu tölur við vinnslu þessa sérheftis um innflytjendur. Skalinn er milli 0 og 1.

Fjárhagur

Heildartekjur

Með heildartekjum er átt við samtölu atvinnutekna, fjármagnstekna og annarra tekna.

Eignir

Eignir eru allar eignir einstaklings, þ.e. fasteignir (bæði innlendar og erlendar), peningalegar eignir (innlán, verðbréf og aðrar peningalegar eignir), aðrar eignir auk ökutækja. Í skattaframtali eru eignir skráðar á þann einstakling sem er eldri ef um samskattaða er að ræða, en við vinnslu gagnanna er þeim eignum skipt í tvennt.

Skuldir

Skuldir eru samanlagðar heildarskuldir. Til heildarskulda teljast allar skuldir einstaklings að meðtöldum fasteignaskuldum sem eru skuldir vegna fasteignakaupa. Skuldir vegna kaupleiguíbúða eru ekki taldar með. Skuldir alls ná til allra í þýðinu, einnig þeirra sem skulda ekkert. Í skattaframtali eru skuldir skráðar á þann einstakling sem er eldri ef um samskattaða er að ræða, en við vinnslu gagnanna er þeim skuldum skipt í tvennt.

Aðrar tekjur

Aðrar tekjur er samtala ýmissa skattskyldra tekna sem ekki falla undir fjármagnstekjur og atvinnutekjur. Lífeyrisgreiðslur, greiðslur frá Tryggingastofnun ríkisins og aðrar bótagreiðslur á borð við atvinnuleysisbætur, vaxta- og barnabætur teljast til annarra tekna. Vaxta- og barnabætur reiknast á greiðslugrunni, þ.e. miðast við það ár sem þær eru greiddar út eða árið á undan tekjuárinu. Auk þess teljast til annarra tekna náms- og rannsóknarstyrkir, vinningar og ýmsar aðrar tekjur.

Eining

Meðaltal

Meðaltal er útreikningur sem byggir á því að taka summuna af safni talna og deila því með fjölda talnanna.

Miðgildi

Hægt er að líta á miðgildi sem töluna í miðjunni. Miðgildi heildartekna er því sú tala sem skilur að lægri helming tekjudreifingarinnar frá hærri helming tekjudreifingarinnar.

Staðalfrávik

Staðalfrávik er mælistika á dreifingu í gögnum. Lágt staðalfrávik bendir til þess að gagnapunktar í ákveðinni dreifingu séu nálægt hvor öðrum, og hátt staðalfrávik bendir til mikillar fjarlægðar milli gagnapunkta. Ef gögn eru normaldreifð, þá eru 68,2% af gagnapunktunum einu staðalfráviki fyrir ofan og neðan meðaltalið. 95,4% af gagnapunktunum eru tveimur staðalfrávikum fyrir ofan og neðan meðaltalið ef gögnin eru normaldreifð.

Fjöldi

Fjöldi í hverjum hóp