Skýringar

Samhliða mánaðarbirtingu, 25. febrúar 2021 voru mánaðarlegar tímaraðir Vinnumarkaðsrannsóknarinnar frá árinu 2003 uppfærðar þar sem nýjum vogum og nýju mati á mannfjölda var beitt við útreikning.
Atvinnuþátttaka er hlutfall vinnuaflsins af heildar mannfjölda.
Atvinnuleysi er hlutfall atvinnulausra af vinnuaflinu.
Vinnuafl samanstendur af starfandi og atvinnulausu fólki.
Atvinnulausir teljast þeir sem ekki voru í starfi í viðmiðunarvikunni, geta hafið störf innan tveggja vikna frá því rannsóknin er gerð og uppfylla auk þess eitthvert eftirfarandi skilyrða:
1. Hafa verið virkir í atvinnuleit sl. fjórar vikur að viðmiðunarviku meðtalinni.
2. Hafa fundið starf sem byrjar seinna, þó ekki síðar en innan þriggja mánaða.
3. Bíða eftir að vera kallaðir til vinnu.
Starfandi teljast þeir sem unnu eina klukkustund eða lengur í viðmiðunarvikunni eða voru fjarverandi frá starfi sem þeir gegna að öllu jöfnu. Fólk í fæðingarorlofi telst vera fjarverandi frá vinnu hafi það farið í leyfi úr launuðu starfi jafnvel þótt það hafi ekki hug á að hverfa aftur til sama starfs.
Svarandi telst vera í fullu starfi ef hann vinnur að jafnaði 35 klukkustundir eða meira á viku. Hann telst vera í hlutastarfi ef hann vinnur 1-34 klukkustundir að jafnaði á viku.
Unnar stundir - eldri tímaröð: Heildarvinnutími svaranda i aðal- og aukastarfi í viðmiðunarvikunni.
Unnar stundir: Heildarvinnutími svarenda í aðal- og aukastarfi í viðmiðunarvikunni að frádregnum matarhléum og fjarveru vegna persónulegra erinda.
Venjulegar vinnustundir er meðalfjöldi vinnustunda sem svarendur segjast vinna venjulega í aðal- og aukastarfi.